රැඩිකල්

 

 උඹ KFC එකෙන් චිකන් බුරියානි කනකොට

පොකට් එකේ සල්ලිත් තියාගෙන

පෙරේත කමින් මිරිකි මිරිකි

මම කෑවේ

කටට තිත්ත වෙලා තිබුන

ගමේ රහට කොළඹ බත් එකක්

                                                     -රමේෂා -

තහනම් ආදරයට ....

             

ඇට මිදුළු වලට රිදෙන්න දැනෙන සීතල තනි කමට කෑගහලා අඩන්න හිතෙන සිතුවිල්ලට මීදුම කඩාගෙන දුවන්න හිතෙන වියරුවට මුකලන් බස්සෝ රිංගන්න හදන හුදකලාවට මං බය නෑ.සීතලට උණුහුමක් වෙලා කදුළට සුසුමක්වී වියරුවට හද ගැස්මක් වී හුලකලාවට විරාමයක් වෙලා උඹ ආපු හින්දා.

උඹව හම්බවුන පළවෙනි වතාව මට මතක් වුනා.මං උඹව විශ්වාස කරන්න කැමති වුනේ නෑ.ඒ නිසා මං “No thanks“කිව්වා.කාලය ගෙවිගෙන ගියා.ජීවිතේ වෙනස් වුනා හොදට හරි නරකට හරි.අත් වාරු නැතිව කෙළින් නැගිටින්න මට ඕන වුනා.ඔලුව උස්සලා බැලුවම යකෝ වටේ හිටපු එකෙක්වත් ළග නෑ.එතකොට මට උඹ ගැන වටින් ගොඩින් ආරංචි වුනා.කවුරුත් උඹට ප්‍රසිද්ධියේ ආදරය කරන්න කැමති වුනේ නෑ.

ඒ මේ ආදරය සමාජය පිලිගත්ත එකක් නොවුන නිසා.“මේක සමාජ විරෝධි වැඩක් “කවුරුත් එහෙමයි කිව්වෙ.ඒ වුනාට බලය තියෙන වුන් හයිය තියෙන උන් මේ වැඩෙන් ඔන තරම් ආතල් ගත්තා ඒවට නිති තිබුනේ නෑ.මේ කාලකන්ණි සමාජයේ හැටි මතක් වෙනකොට මට මේක පෙරළලා දාලා උඩුගං බලා යන්නමයි හිතුනේ.

මේ සිතුවිල්ල විකාරයක් කියලා සමහරු කිව්වා. මං ගණන් ගත්තේ නෑ.මෙහෙම ඉන්න අතරේ මට අහම්බෙන් උඹ මගේ ඇස් ඉස්සරහ කඩා වැටුනා.ඕන මගුලක් කියලා මං උඹ දිහා බාලුවා.උඹත් මා දිහා බැලුවා.මතකද..මගේ ඇසවල කළු ඉංගිරියාව උඹට කරපු ඉගිය.

ඊට පස්සේ අපි ප්‍රසිද්ධියේ නෙවෙයි හොරන් හොරෙන් කීප විටක්ම හම්බු වුනා.ඒ හැම හමුවිමකදිම වගේ උඹයි මමයි දෙන්නෙක් වගේ දැනුනේ නෑ.ඇග පුරාම ගෑවුන උඹේ සුවදට මං මාර විදිහට ආදරේ කරා.ඇත්තමයි.මුලින් උඹයි මමයි විතරයි.පස්සේ පස්සේ කීපදෙනෙක් මගෙ හොදම යාලුවෝ කිප දෙනෙක් අපේ සම්බන්දේ දැනගත්තා.අවුලක් වුනේ නෑ.මොකද  උන් මගේ ගැන කාලෙක ඉදලා දන්න නිසා.

සිරාවට උඹ නිසා මගේ ජීවිතේ වෙනස් වුනා.ඔළුවේ තිබුන කුණු කන්දල් පිච්චිලා ගියා.මට ඕන වුන ඒත් මාව එපා වුන හැමෝම මග ඇරලා මම ඇවිද්දා නිදහසේ උඹ එක්ක.මගේ වටේ වේගෙන් දුවන ලෝකේ මැද මම නතර වෙලා බලන් උන්නා.මේ වෙනකොට මම කදුළට වෙඩි තියලා මරල දාලයි තිබුනේ.

සිතුවිලි එකතු කරලා ඒවලින් මාල ඇමිණුවා.හිනා වුනා.හුස්ම ගත්තා උඹත් එක්ක නිදහසේ.උඹ මට ආදරේ කළා,මං උඹට ආදරේ කළා කවුරු මොන දේ කිවුවත් ඉඩක් තිබුන හැම ඇසිල්ලකම අපි අපේ වුණා.

මං සමාජ විරෝදියෙක් වුනා.දේශපාළුවෝ,බඩුකාරයෝ,මිනීමරුවෝ,

හුරාකන්නෝ, නිළ ඇදුම් ඇදගත්ත ලෙඩ්ඩු අස්සේ මම සමාජ විරෝධියෙක් වුනා.හිතේ කිසිම කහටක් නැතුව.

යටිපතුල් සීතල වෙනකල්,කන් පෙති යාන්තමට රත් වෙනකල්,රිදෙන හීන ඈතට පාවෙලා යනකල්,මට මාව නැතිවෙලා හිසු තැන් ඉතිරි වෙනකල් උඹ මට ආදරේ දුන්නා.මහා ලෝබ කමකින් මම ඒ ආදරේ ඇතුලේ ගුලි වුණා.පාට හේදෙන හීන ,වියරු වැටෙන ඇස් ගෙඩි,ලාබ සිත්තටික් වචන,හැමදේම අරගෙන ගුලිකරලා තරු නැති අහසට විසි කරලා මං උඹට ගුලි වුනා තව තවත්.ගෙඩි නැති ගස් වද වගේම තරු නැති අහස මුසලයි කියලා කිව්වට මට තරු තියෙන අහසේ කිසිම නිදහසක් දැනුනේ නෑ.උඹ නැති දවස් වලට මම පාලු පාරවල්  දිගේ ඇවිද්දා. මාර විදිහට හැම දේම වෙනස් වෙලා.මට පෙනුනේ හැමදේම අළුත් වගේ.කිසිම පිළුණු ගදක් තිබුනේ නෑ.

එළියේ උන් උඹව හංවඩු ගහනකොට මට හීනියට රිදුනා.උන්ගේ සුදුපාට ජීවිත ගැන මට තිබුනේ බයක්.කළු තිත් වලට බයේ සුදු රෙද්දක් පොරව ගන්න මට ඕන වුනේ නෑ.ඒ නිසා මං උඹට නිදහසේ ආදරේ කළා.මට තවත් සීතල දැනුනේ නෑ. අඩන්න කදුළු තිබුනෙත් නෑ.තනිකමත් මාර ආතල් කියලා දැනුනා.හුදකළාව විදින්න පුරුදු වුනා.උඹ ගැන කියන මේ කථාව ගොඩාක් දික් වුනා. කියවුන උන් හිතයි මේකිගේ ලව් ඉලව් අපිට මෙකටද කියලා.

ඒත් ඒ ආදරේ මගේ විතරක් නෙවෙයි.සමහර විට ඔයත් උන් කියන විදිහට සමාජ විරෝධියෙක් වෙන්න ඇති.මල් වලට බමරු එන එක නවත්වන්න බඩුකාරයින්ගේ නීතිරීති වලට බෑ.කුහකත්වයට අසංවේදී ගෝත්‍රික අදහස් වලට,නිල ඇදුම් දාගත්ත ලෙඩ්ඩුන්ට උඹෙයි මගෙයි ආදරේට නීති දාන්න බෑ.

උන්ට අයිතියක් නෑ මගේ ආතල් එක කඩන්න.මොකද කුටුම්භ ඇතුලේ සිරවෙලා,කුහක සදාචාරයෙන් වල්කම් වහගන්න දගලන උන්ට බෑ අහිංසක මගේ සතුටට බාධා කරන්න.උන්ගෙ ගදගහන ලොකෙට වැඩිය සමාජ විරෝධීයෙක් වෙන එක උතුම් මට.

මං උඹට ආදරෙයි මට මොකා නැති වුනත්.උන්ට හරියටම ඇත්ත තේරිලා ෆැන්ටසියෙන් අවදි වුන දවසට ෂුවර් එකටම එයි  මගෙත් එක්ක මේ ආතල් එක බෙදාගන්න.ඒකනම් කරන්න බෑ පුතෝ කවදාවත් අම්මා මුත්තා කිව්වත් මගේ ආදරේ බෙදා ගන්න මං ලෑස්ති නෑ.කවුරු කවුරුත් උන්ගේ හීන වල හැටියට බුදු වුණාවේ.මම නම් මගේ ආදරේ බෙ දා ගන්න ලෑස්ති නෑ. මට බෑ උන් එක්ක  සුස්තිය බෙදා ගන්න දෙයියෝ...

-රමේෂා -

මගේ LOVE එක

අතීත කථාවෙදි හාවා ඉබ්බට හැමදාම පැරදුනා.නැත්තං ඉබ්බා හාවව හැමදාම රැවැට්ටුවා.ඒත් එතන තිබුන ඇත්ත සීන් එක කවුරුත් දන්නේ නෑ.හාවා ඉබ්බට සෑහෙන්න ලව් කලා.හාවට ඕන වුනේ ඉබ්බා දිනනව දකින්න.හාව කළේ ඉබ්බට නොදැනෙන්න බොරු නින්දක් මවාගෙන ගහක කදකට සෙට් වෙලා ඇහැ පියා ගන්න එක.ඉබ්බා හිමින් හිමින් හාවා පහු කරගෙන යනකොට හාවා මිමිණුවා“මම උඹට සෑහෙන්න ආදරෙයි“ඉබ්බට වැදගත් වුනේ දිනුම් කණුව විතරයි.එයා හිතුවේ හාවා මහ මෝඩයෙක් කියලා.හාවගේ ආදරේ තේරුම් ගන්න බැරි තරමට ඉබ්බට තරගේ සීරියස්.ඉතින් ඉබ්බා දිනුවා.හාවා පැරදුනා.පුංචි කථාවක් වුනාට ඒක මට මාරයි.ඒ මමත් හැමදාම හාවා වෙලා උඹ ඉබ්බා වුන නිසා.

-රමේෂා

පබා කුවේණි සහ පට්ට කෑලි

Ladies First… අපි කාටත් නිතර මේ වචනය ඇහුනද  ඊයේ පෙරේදා  කාන්තා දිනයදා  සම තැන සහ නිසිතැන ඉල්ලා කාන්තාවන් අව් කණ්නාඩි පැළද නිදහස් චතුරස්‍රය ලග උද්ඝෝෂණය කරනු දුටුවෙමි.ඒ අතර සමහර කාන්තාවන් ගේ සැමියන් සිය බිරිය උද්ඝෝෂණය අවසන් කර පැමිණෙන තුරු මෝටර් රථ ගාල්කරගෙන සිටින සිටින ආකාරයත් දැකිය හැකි විය.මේ අතර පබා හෙවත් උපේක්ෂා ස්වර්ණමාලි වහා ගෘහස්ථ ප්‍රචණ්ඩත්වයට එරෙහි විය යුතු බව පාර්ලිමේන්තුවේදී කියා සිටියි.මෙහි පුදුමය මෙයයි පබාට ගෘහස්ථ ප්‍රචණ්ඩත්වයට එරෙහි විය යුතු බව සිහිවන්නේද අර උද්ඝෝෂණය කළ කාන්තාවන්ට කාන්තා දිනය සිහිවු ආකාරයටම වීමයි.

කිසි දිනක පරමාදර්ශි කාන්තා චරිතයක් බිහි නොවු ශ්‍රීලංකාවේ කාන්තාව අද කොයිබටද? වත්මනෙහි ශ්‍රීලංකාව සතු ප්‍රබලතම ගැටළු අතරින් එකක් වන්නේ එයයි. පුරුෂ මුලිකව නිර්මාණය වු ලෝක ඉතිහාසය තුළ ආගමික ඉගැන්වීම් තුල සැමවිටම කාන්තාව සලකා ඇත්තේ දෙවෙනි කොට බව පැහැදිලිය.බයිබලයට අනුව මුලින්ම දෙවියන් වහන්සේ ආදම් නිරමාණය කරන අතර ඔහුගේ වම් ඉල ඇටයෙන් ඒවා මැවු බව කියවේ. මුලින්ම තහනම් ගහේ ගෙඩි කෑමට ආදම් පොළඹවන්නේ කාන්තාව බව කියවෙයි.ග්‍රීක ඉතිහාසයට අනුව ජුපිටර් දෙවියා ප්‍රොමිතියුස් සහ එමතියුස් ලවා මිනිසා නිර්මාණය කරන අතර මිනිසාගෙන් පළි ගැනිමට පැන්ඩොරා නම් කාන්තාව නිර්මාණය කර අයහපත පිරුණු මංජුසාවක් ඇය අතට දෙයි.මෙම මංජුසාව පිලිබදව පැන්ඩොරාට කුතුහලයක් ඇතිවී දේව අණ නොතකා ඇය එම මංජුසාව විවිර කර බැලු නිසා අයහපත සහ නපුර ලොව බිහිවෙයි.මෙම සියලු මතවාද ගත් කළ ලොව නිරමාණය කළ බව කියන දෙවියන් පවා පුරුෂෝත්තමවාදි ලෙස කටයුතු කර ඇති බව සක් සුදක් සේ පැහැදිලිය.

නමුත් 19 වන සියවසේ මුල භාගය වන විට කාන්තාව සිය ලිබරල් අයිතින් උදෙසා පෙළ ගැසිම අරඹයි.මුලික වශයෙන් ඇමරිකාව කේන්ද්‍ර කරගෙන මෙම කාන්තා නැගී සිටීම් ඇරඹෙන අතර පසුව එය ලෝකය පුරා පැතිර යයි.ශ්‍රේෂ්ට රුසියානු විප්ලවයේ කාන්තාව  සටන් කාමී කාන්තාවක් බවට පත් වන්න් ඒ නිසාය.නමුත් දේව පුරානයේ පටන් පැවති පුරුෂොත්තම වාදි සංකල්ප වලට යටින් මේ සියලු හඩ නැගිම් අදටත් සිදුවන බව නම් බරපතල කරුණකි.

අපි ආසියානු කාන්තාව දෙස බලමු.ආසියානු කාන්තාවක් කිසියම් ක්ෂෙත්‍රයක කිර්තියට පත්වන්නේ නම් ඊට හේතුව වුනේ පුරුෂයෙකි.මෙය පුරුෂොත්තම වාදි ප්‍රකාශයක් නොව සැබැ යථාර්ථයයි.බෞද්ධ ඉතිහාසය තුල යසෝදරාට සිදුහත් කුමරු තොරාගැනීමට සිදුවන්නේ සිය කැමැත්ත මත නොවේ.මනමේ කුමරියට සිය පියා වන දිසාපාමොක් ගේ හොදම සිසුවා සරණපාවා ගැනීමට සිදුවෙයි.කුවේණිය රවටා රාජ්‍ය බලය උදුරාගන්නා විජය පසුව මධුරාපුරයෙන් කාන්තාවක් ගෙන්වා ගෙන කුවේණිය පලවා හරියි.

ආසියානු තත්වය ගත් කළ සෝනියා ගාන්ධි අද මතුවන්නේ රජිව් ගාන්ධි තුලිනි.අවුන් සාන් සුකි බිහිවන්නේ ඇගේ පියා ජනරාල් අවුන් සාන් විම හේතුවෙනි. බෙනාසිර් භුතෝ අලි භුතොගේ දියණිය වන අතර බංග්ලාදේශයේ කලිඩා ෂියා සිය සැමියාගෙන් පසු දේශපාලනයට පිවිසෙන්නීය.ශ්‍රිලංකාවේ සිරිමාවෝ බණ්ඩාරණායක බිහිවන්නේ එස් ඩබ්ලිව් ආර් ඩී බණ්ඩාරනායක ගේ ඝාතනය විම නිසාය.ඉන් පසුවද චන්ද්‍රිකා,පවිත්‍රා,සුමේධා,නිරූපමා සහ සුදර්ශනී ප්‍රනාන්දු පුල්ලේ වැනිකාන්තා දේශපාලන චරිත බිහිවන්නේ පුරුෂ කේන්ද්‍රියව වීම මෙහි විශේෂත්වයයි.

මේ නිසා වත්මන් ලාකේය කාන්තාවට පරමාදර්ශි චරිතයක් නොමැත.මෙය හොදින්ම දන්නා මාධ්‍ය කරුවෝ කාන්තාවට පරමාදර්ශි විර චරිත ලෙස තුල්සි ,ප්‍රවිණා වැනි චරිත හදුන්වා දෙන අතර එමචරිත අති සාර්ථක ලෙස සමාජගත වෙයි.

එම ෂානරයේ කාන්තාව තව දුරටත් පුරුෂොත්තම වාදී සංකල්ප ප්‍රවර්ධනය කරමින් සිටිති.තමා තම සැමියාගෙන් පහර කෑමට වඩා පබාට සැමියා පහර දීම මාර සීන් එකක් වන්නේ මේ හේතුවෙනි.පට්ට කෑල්ලක් නොවුනොත් අද පවතින්නට බැරි යැයි සිතන කාන්තාව තව දුරටත් පුරුෂයා මත පදනම්ව ජීවත් නොවන බව කියන්නට හැක්කේ කාටද?

කාන්තාවට ස්වාධීන පසුබිමක් ගොඩනගා ගැනීමට නොහැකිව ඇත්තේ සංස්කෘතික බාධකය නිසා බව අද කවුරුත් එළි පිට පිලිනොගනිති.පුරුෂෝත්තම වාදී සංකල්ප වල නිර්මාණයක් වන ලාංකේය මව සිය දියණිය තුලට රිංගා ඇයගේ අනන්‍යතාවට හානි කිරිමට පටන් ගන්නේ වැඩිවියට පැමිනුන දිනයේ සිටයි.එතැන් පටන් මව තුලින් සිතන්නට පතන්නට දියණියන්ට සිදුවීම අභාග්‍යයකි.මේ නිසා ස්වාධින කාන්තාවකට බිහිවිමට අවශ්‍ය අවකාශයක් මෙම සංස්කෘතික යැයි කියාගන්නා ඊනියා පසුබිම තුළ නැත.සම තැන නිසි තැන සමාජයෙන් ඉල්ලා සිටීමට පෙර ස්වකීය ස්වාධීනත්වය ආරක්ෂා කර ගැනීමට කාන්තාවට හැකි වේ නම් ලාංකේය කාන්තාව මිට වඩා සාධනීය තත්වයකට පත්වනු නොඅනුමානය.

අපරාදේ වැලන්ටයින්

 ආවේ නෑ වැලන්ටයින්

අවුරුදු හතරක් හිටියා බලන්

ලැබුනේ නෑ මල්

හිටපු පෙම්වතිය රැඩිකල්

“ආදරය විකුණන්න මං කැමති නෑ“

අළුත් පෙම්වතී - හරි අහිංසකී

හිටියේ මාස දෙකයි

දවස් දෙක තුනකට කලින්

ඇයත් ගියා යන්න

වැලන්ටයින්

මං උඹට කියන්නමයි හිටියේ

මහන්සි වෙන්න එපා වරු ගණන්

“ ප්‍රේමය මහ බොරුවක් බං“

මුබාරක් ගෙදර යැවූ facebook කැරැල්ල

අහම්බෙන් පත්වු ඊජිප්තුවේ හොස්නි මුබාරක්ට  අහම්බෙන්ම ගෙදර යන්නට සිදුවිය. සන්නද්ධ බලය අතින් ලොව 10 වන තැන සිටි ඊජිප්තු හමුදාවේ සේනාධිනායකයා අන්තර්ජාලයට මෙතරම් දෙයක් සිදුකළ හැකි බව හීනෙකින් වත් නොසිතන්නට ඇති.එහෙත් කරුමෙට මෝල්ගහත් පත්තු වෙනවා යැයි කියමනක් සිංහල කියමන් අතර තිබේ.ඒ අනුව  ඊජිප්තු ජනාධිපතිට පත්තුවුයේ වූයේ මෝල්ගහකි.

මෙය අන්තර්ජාලයෙන් රජයකි පෙරළු ලොව මුල්ම අවස්ථාවයි.හොස්නි මුබාරක්ගේ 30 වසරක  පාලනය  මේ තරම් රට වැසියාට එපාවී සිටි බව මින් පෙර කිසිදු දේශපාලනික හෝ විපක්ෂ බලවේගයකට හදුනා ගත නොහැකිව තිබිණි.වසර තිහ හතලිහ පළපුරුදු දේශපානඥයෝ කසාය බිව් ගොළුවන් සේ සිටියදී අන්තර්ජාලය හරහා ලොව මුල්ම වරට මේ මහා ජන බලවේගය එක් රැස් කරන්නේ පරිඝණක විද්‍යාඥෙයකි.මේ එහි සත්‍ය කථාවයි.

ඊජිප්තුවේ වීරයා

කලීඩ් සයිඩ් ඊජිප්තුවේ ඇලෙක්සැන්ඩ්‍රියා ප්‍රදේශයේ විසු 29 හැවිරිදි තරුණයෙකි.පියාගේ මරණයෙන් පසු මව සහ සොහොයුරා සමග ගතකරන කලීඩ් සංගීතයට සහ පරිගණකයට මහත් සේ ප්‍රිය කළ තරුණයෙකි.තමන්ගේම කියා ගීත ඇල්බමයක් එළි දැක්විමේ අහිංසක බලාපොරොත්තුවකින් පසුවන කලීඩ් දිනපතාම සවස් කාලයේ Internet café වෙත ගොස් අන්තර්ජාලය ඇසුරු කිරිම පුරුදුදක් කරගෙන සිටියේ තමාටම කියා අන්තර්ජාල පහසුකම් ලබාගැනීමට තිබු ආර්ථික අපහසුතා නිසාමය.

සුපුරුදු පරිදි පසුගිය වසරේ ජුනි 6 වනදා සුපුරුදු Internet café එකට යන කලීඩ් කිසිවකුට අවහිරයක් නොවන පරිදි සිය කටයුතු කරගෙන යන අතර එම ස්ථානයට කඩාවදින පොලිස් නිලධාරින් දෙදෙනෙක් කලීඩ් ගෙන් කප්පම් ඉල්ලා සිටියි.එහෙත් රැකියාවක් නොකරන කලිඩ් කප්පම් ගෙවිමට අපොහොසත් වු නිසා පොලිස් නිලධාරින් දෙදෙනා ඔහුට පහර දීමට පටන් ගනියි. අන්තර්ජාල මධ්‍යස්ථානයේ වු ටෙරාසෝ මේසය මත කලිඩ්ගේ හිස පොලිස් නිලධාරින් කිහිපවිටක්ම අනිනු දුටු බව අන්තර්ජාල මධ්‍යස්ථානයේ හිමිකරු පවසයි.පසුව කලිඩ් එළියට ඇදගෙන එන පොලිස් නිලධාරින් ඔහු බිම දමා යළි පහර දි පොලිස් මෝටර් රථයක දමාගෙන පලා යයි.අවාසනාවන්ත ලෙස කලීඩ් මියයයි.කලීඩ් මත්ද්‍රව්‍ය ඇතුලත් කුඩා බෑගයක් ගිල දැමු බව පොලිසිය කියයි.

කෙසේ වුවද කලීඩ් පහරකෑමට ලක්වුන ආකාරය facebook හරහා මුළු ඊජිප්තුව පුරාම පැතිර යාමත් සමග

 කලීඩ්ගෙ අවසන් කටයුතු සදහා දහස් ගණනක් ජනයා එකතුවෙනවා.මෙම අමානුෂික ඝාතනයට එරෙහිව මහා ජන රැල්ලක් නිරිමාණය විය.මෙය අනෙකුත් නගර කරාද ලැව් ගින්නක්සේ පැතිර ගියෙය. කලීඩ්ගේ අවසන් කටයුතු සිදුවුන දවසෙම කයිරෝ නුවර පිහිටි අභ්‍යත්තර කටයුතු පිළිබද අමාත්‍ය වරයාට ඉල්ලා අස්වෙන්න කියලා බල කරලා විරෝධතාවක් පවා ඇතිවිය.

මේ උද්ඝෝෂණයට  පොලිසිය පහර දෙන අතර  රට පුරා මෙම විරෝධතා කරුවන්ට පහරදීම සහ ,සයිඩ් ගෙ මරණයය නිසා ඊජිප්තුව  කැළඹිලි සහිත තත්වයකට පත්වෙනවා

  

සටනේ නියමුවා

මේ අන්තර්ජාල විප්ලවයේ  නියමුවා වෙන්නේ වයෙල් ගෝනිම් ,30 හැවිරිදි ගෝනිම් දෙදරු පියෙක්. මයිකක්‍රොසොෆ්ට් සමාගමේ ඊජිප්තුවේ  අලවි විධායකවරයා වන්නේ ඔහු  .ඔහු කලීඩ් සයිඩ් වෙනුවෙන් නිර්මණය කරනවා වෙනම facebook group  එකක් We Are All Khaled Said  නමින්.මේකට නොහිතූ තරම් හොද ප්‍රතිචාර ලැබෙනවා.

මේ නිසාම හිටපු ගමන් වයෙල් ගෝනිම් අතුරුදන් වෙනවා.ඇස් බැද  පහර දී  මහමග දමා ගොස් සිටියදී දින 12කට පස්සේ ගෝනිම් සෙයොගැනෙනවා.ඉන් පසුව වයෙල් ගෝනිම් එක්තරා රූපවාහිනී  නාලිකාවක සම්මුඛ සාකඡ්චාවකදි ඉතා සංවේදි ආකාරයට අදහස් දක්වනවා.කලීඩ් සයිඩ්ගේ මරණය ගැන සහ රටේ තත්වය ගැන කෙරුණු මේ ප්‍රකාශ වලින් අවුරුදු තිහකට අධික කාලයක් පීඩාවට පත්වෙලා හිටපු ඊජිප්තු තරුණ කණ්ඩායම් වලට අමුතු ජවයක් උත්තේජනයක් ලැබෙනවා.එහි ප්‍රතිඵලය වෙන්නේ එම සම්මුඛ සාකඡ්චාව විකාශය වු දින රාත්‍රියේ We Are All Khaled Said කියන facebook group  එකේ සාමාජිකත්වය දස දහස් ගණනකින් ඉහල යාමයි

මේ කාලේ වෙනකොට ටියුනීසියවේ ජනාධිපතිවරයා ජනතා උද්ඝෝෂන වලින් පලවා හැරල ඉවරයි.ඒ උණුසුමත් එක්ක ලැබුණු මේ ප්‍රතිචාර වලින් ජනතාවගේ සැබැ අදහස තේරුම් ගන්න වයෙල් ගෝනිම් ජනවාරි 25 වෙනිදා We Are All Khaled Said සාමාජිකයින්ව කයිරෝ නුවර ටරීර් චතුරස්‍රයට කැදවනවා.මේ බව මාධ්‍ය වලින් ප්‍රචාරය විමත් සමග තවත් රාජ්‍ය විරෝධි බලවේග,ජනතා සංවිධාන රැසක් ටරීර් චතුරස්‍රයට රොක් වෙනවා.මේ අතරින් ඇතැම් පිරිස් එන්නේ ටියුනීසියා කොඩි රැගෙන ටියුනිසියා ආදර්ශය පෙරට ගෙනයන බව සංකේතවත් කරමිනි.මේ තමයි අන්තර්ජාලය ඔස්සේ සංවිධානය වෙන ලෝකයේ මුල්ම ජනතා නැගිටිම.

ජනාධිපති හොස්නි මුබාරක්ට ඉවත්වන්නැයි බලකරමින් පුරා දින 18ක් ටරීර් චතුරසුයේ කදවුරු ලාගෙන සිටි පිරිස ලක්ෂ 8කට වැඩියි.පදික වේදිකාවේ සිට මහා මන්දිරය දක්වා අනිකුත් සියලු බේද අත්හැරපු ප්‍රගතිශීලි පිරිස් මේ ක්‍රියාවට එක්වුනා. මෙලෙස ගිණියම් වු පිරමිඩ දේශය සිසිල් කරන්නට මුබාරක් දැරෑ සියලු උත්සහයන් අසාර්ථක වුයේ  එක් රොක් වු ජන සමුහය දේශපාලනික පටු අරමුණකින් තොරවීම නිසාමය

මෙම ශුද්ධ අරගලයේ නියම විරුවා වන කලිඩ් සයිඩ්  රටක් සහ රජෙක් පමණක් නොව ලොවක් සසල කරන්නට තරම් ශක්තියක් තමන්ට ඇති බව සිහිනෙකින් වත් නොසිතන්නට ඇති.එහෙත් හෙට බිහිවන නව ඊජිප්තුවේ සැබෑ වීරයා ඔහුය.කලිඩ් සයිඩ් අද ලෝකයටම විරයෙකි. කලිඩ් සයිඩ් සහ වයෙල් ගෝනිම් පිලිබදව ලෝක ඉතිහාසයේ රන් අකුරින් ලිවිය යුත්තේ එහෙයිනි.